ÓHEPPNI

Fyrir nokkrum mánuðum var spiluð Evrópukeppni í sveitakeppni. Ísland keppti í þremur flokkum, opnum flokki, kvennaflokki og eldri flokki (Seniors Cup). Kvóti Evrópu var að átta efstu sveitirnar unnu sér rétt til að spila í heimsmeistaramótinu. Það kom fáum á óvart að Íslandi tókst að komast í þennan hóp í flokki eldri spilara. Liðið var mjög sterkt og skipað pörunum Aðalsteini Jörgensen-Ásgeiri Ásbjörnssyni, Þorláki Jónssyni-Hauki Ingasyni og Birni Eysteinssyni-Guðmundi Sveini Hermanssyni. Í byrjun vikunnar hófst heimsmeistaramótið í Ítalíu (Salsomaggiore) og íslenska liðið byrjaði mjög hægt. Tapaði þremur fyrst leikjunum á fyrsta deginum (mótherjarnir voru Þýskaland, Ástralía og Pólland). Útlitið var ekki bjart en næstu daga fór liðinu að ganga betur og var komið í níunda sætið í leik gegn Argentínu (níunda og tíunda sætið voru að spila innbyrðis) í tíundu umferð riðlakeppninnar. Fyrir síðasta spilið í leiknum vorum við 7 impa yfir í leiknum þegar þetta óheppilega spil kom fyrir. Aðalsteinn sat í vestur og sat með ansi sterka hönd. Svo óheppilega vildi til að að Haukur í austur varð sagnhafi í sex gröndum, enda 33 punktar milli handanna. Argentínumaðurinn í suður doblaði eðlilega og tók ÁK í tígli. Vestur var gjafari og AV á hættu.

                        10982

                        6543

                        762

                        86

KDG4                                     Á76

ÁD2                                        KG107

G943                                      D5

ÁD                                          KG72

                        53

                        98

                        ÁK108

                        109543

Argentínumenn voru svo heppnir að vestur var sagnhafi í 6 gröndum á hinu borðinu. Útspilið var spaðatía og sagnhafi gat tekið tólf slagi á litina fyrir utan tígul. Það kostaði Ísland 17 impa og nokkuð hrap niður töfluna. Pakistanski spilarinn, Zia Mahmood, var svo heppinn, í sínum leik, að vestur opnaði á tveimur gröndum og kerfi andstæðinganna gerði það að verkum að austur sagði þrjá tígla. Zia doblaði (í suður) og vestur varð sagnhafi í sex gröndum. Norður átti auðvelt útspil í tígli og vörnin tók tvo fyrstu slagina. Fjölmargir í sex gröndum unnu þau ef útspilið var ekki í tígli. Fyrstu andstæðingar, daginn eftir (fimmtudagur 31. mars), var mjög sterkt lið Bandaríkjamanna (USA 2). Sá leikur tapaðist naumlega 32-42 (7,32 stig) og þá var Ísland komið niður í tólfta sætið og skuldaði rúm ellefu stig í áttunda sætið. Síðasti leikur fimmtudags var leikur gegn Indlandi, sem var í toppbaráttunni. Sá leikur virðist hafa verið vel spilaður og tapaðist 7-14 í impum, sem gaf Íslandi 7,97 stig. Þegar þessi orð eru skrifuð, var skuldin rúmlega 9 impar í áttunda sætið og var Ísland númer 11.  Riðlakeppnin verður haldið áfram fram á sunnudag. Áttunda sætið er eftirsóknarvert, því að lokinni riðlakeppni fara átta efstu sveitirnar í útsláttarkeppni og úrslitaleikurinn verður föstudaginn 8. apríl og laugardaginn 9. apríl. 

Ísak Örn Sigurðsson