Rangæingar -- Björninn breiði

Sl. þriðjudag komu Framsóknarmenn í Rangárþingi, og tveir eða þrír að auki, saman að Heimalandi til að leika þriðju umferð í Samverkstvímenningnum.  Til leiks mættu 14 pör.   En hver getur stoppað Björninn breiða?   Á árum áður var Björninn breiður um herðar og er svo sem enn breiður en núorðið einkum um mittið.   "Sé ég með Eyþór" sagði Björninn að leikslokum í gær, enda mikill aðdáandi Dúdda úr "Með allt á hreinu", "þá nær mér enginn".

Þeir félagar fóru enda mikinn og tóku myndarskor, 64,4%.   Útgerðarmaðurinn og Héraðshöfðinginn komu næstir inn með 60,9% skor og þriðju urðu reglubræðurnir Svavar og Jói með 56,1% skor.   Besta kvöldið hjá þeim í langan tíma, vel gert drengir!

Aðrir fengu minna, og sumir miklu minna, eins og skáldið sem var andlaus í spilamennskunni þetta kvöldið og er enn andlaus, svo engar eru vísurnar í þetta sinn.

Úrslit kvöldsins og spilin má sjá hér og stöðuna eftir þrjú kvöld hér