Rangæingar -- Suðurlandsmeistarinn

Sl. þriðjudag skunduðum við Rangæingar á Heimaland og lékum fjórðu umferð í Butlernum.   Til leiks mættu 11 pör.

Efstur á blaði endaði Suðurlandsmeistarinn Björn.   Hinn Suðurlandsmeistarinn var upptekinn við að sletta skyrinu, þó hann eigi það reyndar ekki.   Björn fékk því piltung nokkurn úr Árnesþingi með sér.  "Hann er auðvitað lítt reyndur drengurinn en ég er hins vegar alveg þaulreyndur. Reynsluleysi hans var bagalegt en kom ekki að sök þó drengurinn sé vart af barnsaldri".  Þeir Sigurður Jón náðu í 62,7 impa.

Annað sætið hrepptu Framsóknar- og félagshyggjuforkólfarnir Jói og Siggi með 40,7 impa eftir lítt spennandi úrslitalotu við vertinn og kaupamanninn í Varmahlíð.  Varmahlíðarmenn lutu í gras og enduðu með 29,7 impa í 3. sæti, sem er þó skínandi árangur.  Alla vega finnst okkur hinum það, sem minna fengum úthlutað af góðgætinu.

Eins og kunnugt er urðu Kalli á Grund og Elli á Arnarhóli hlutskarpastir síðast.   Í tilefni af því kom Kalli færandi hendi með pönnukökur og smákökur fyrir keppendur.    Góður rómur var gerður að því og hlaut Kalli mikið lof fyrir bragðgæði.   Vera kann þó að Anna hafi bakað bakkelsið.   

Úrslit og spil má sjá hér

Staðan í butlernum er svo hér en við endanlegt uppgjör leggja menn lakasta skorið frá sér, þ.e. 4 bestu af 5 gilda.