Rangæingar -- Þríhöfða þurs og Kanastaðabóndinn

Nú er farið að síga á seinni hlutann í sveitakeppninni, einungis ein umferð eftir og línur farnar að skýrast.  Þó getur s.s. allt gerst enn, enda muna langminnugir menn enn árið þegar efsta sveitin (Jói í Moldnúpi og hans kátu kappar) voru með 19 stiga forskot fyrir síðustu umferð en fengu einungis 0,37 stig í lokaumferðinni og töpuðu af titlinum.

Efstu sveitirnar mættust í innbyrðis leik í gærkvöldi og var vandað vel til verka, þeir voru góðum klukkutíma lengur að spila sinn leik en við hinir, minni spámennirnir.   En það er auðvitað aukaatriði, spennan var mikil.  Aðalatriðið er að HLH-flokkurinn vann Óðmenn 14-6 og kom sér notalega fyrir á toppnum, 9,83 stigum á undan Óðmönnum sem verma annað sætið.   

Botnbaráttan harðnaði hins vegar mjög í gærkvöldi.   Þursarnir mættu þríhöfða til leiks, þar sem formaðurinn og yfirþursinn fór í fríið eftir frækilega frammistöðu í tvímenningi fyrir viku síðan. Í hans stað kom Kanastaðabóndinn og gerði vel. Þursanir unnu sinn fyrsta leik þegar þeir lögðu Sykurmolana 15-5.   "Gott þú komst væni, mér hentar nefnilega betur að spila tvímenning" sagði formaðurinn í langlínusímtali við Kanastaðabóndann eftir leik.

Lónlí blú bojs (einmana sjálfstæðismenn í lauslegri þýðingu) gripu loks til að mestu ónotaðra vopna og tóku YES-menn í bakaríið 17-3.  "Heyrðu, bara ánægður með guttana" sagði slátrarinn kampakátur um félaga okkar Einar og Kristján, sem báðir eru að vísu um sjötugt, og áttu prýðisleik í gærkvöldi.

Einungis munar nú þremur stigum á sveitunum í 4.-6. sæti og enginn vill enda neðstur.   "Hvað ertu annars að gera næsta þriðjudag Eiríkur minn?" lauk formaðurinn símtali sínu við Kanastaðabóndann á.

Úrslit leikja og stöðuna í sveitakeppninni má sjá hér

Butler í fyrri hálfleik hér og þeim seinni hér.  Staðan í butlernum eru svo hér