Rangæingar -- Sveitakeppnin hafin
Sl. þriðjudag hófum við Rangæingar sveitakeppni félagsins. Til leiks skráðu sig 12 pör og raðar spilastjóri pörum niður í sveitir með það að markmiði að gera þær sem jafnastar að getu. Til þess er beitt hávísindalegum aðferðum, þar sem tekið er tillit til árangurs para sl. ár. Eina sem öruggt er að sveitir verða ekki eins á milli ára. Butlerárangri para er líka gert sérstaklega hátt undir höfði og hann verðlaunaður myndarlega að vori.
Hirðskáldið okkar, sundlaugarvörðurinn spengilegi, leiðir sveitina Óðmenn. Óðmenn byrjuðu sem óðir menn og lögðu Þursaflokkinn, sem Tottenhamtröllið leiðir, næsta örugglega 16,17-3,83. Óðmenn tóku þar með forystuna í sveitakeppninni og hefur skáldið ort óð af minna tilefni.
Hinir leikirnir voru jafnari. Hjalti og Logi, skipta með sér formennsku í sveit HLH-flokksins sem vann Lónlí blú bojs, sem uppgjafasjálfstæðismaðurinn veitir forstöðu, 12,76-7,24.
Sigurður Jakob, sem til skamms tíma var sýslumannsfrú í Varmahlíð og stóð þar fyrir einkar myndarlegu heimili, þykir með þokkafyllri og nettari mönnum. Helst að Sigurjón, makker hans, nái í hælana á honum hvað þokka varðar. Þeir tefla því fram sveitinni Sykurmolunum sem mörðu Stuðmenn 10,24-9,76. Stuðmenn breyttu reyndar nafni sínu í gær í YES, enda leiðir Svavar sem þekktur er fyrir sín þrumuJESS, sveitina.
Úrlit leikja og stöðuna í sveitakeppninni sjá menn hér
