Rangæingar -- Blásarasveitin
Sl. þriðjudag lauk sveitakeppni okkar Rangæinga. Saxófónbræður luku leik með sóma og sann, þó formaðurinn skipti sér út úr byrjunarliðinu og stillti upp litlum þverflautuleikara frá Selfossi sem djúpum miðjumanni í síðasta leik. Formaðurinn fór til Tenerife, enda keppnin þegar unnin og engin þörf á háu tónunum. Hann var þó í símasambandi við sína menn og stýrði leik þeirra af röggsemi. Því fór svo að Sæfinnur sjókall átti ekki roð í blásarasveitina og fór heim roðlaus og beinlaus með tæp 3 stig.
Sigursveit þessara músiktilrauna, Stjána saxófón, skipa eftirtaldir:
Kristján Mikkelsen, lék á ráman tenórsax alla keppnina
Halldór Gunnarson, lék á túbu og kontrabassa alla keppnina.
Bergur formaður Pálsson, lék á trompet og slagverk, lungann úr keppninni.
Friðrik Þórarinsson, lék á þríhorn af lipurð alla keppnina.
Brynjólfur Gestsson, ekki byrjunarliðsmaður, lék á þverflautu í lokaleiknum.
Af andstæðingum þeirra í síðustu umferð, Sæfinni sjókalli, er það að segja að eftir að skipstjórinn varð eftir á hafnarkrá í Hull, í 3ju umferð, rak sjókallinn stjórnlaust niður í neðsta sætið. Búið er að taka skipstjórnarréttindin af Didda, afleysingaskipstjóra. Af tillitsemi við liðsmenn sveitarinnar verður nafna þeirra ekki getið hér.
Litli Jón sigldi lygnan sjó allt mótið og endaði í öðru sæti. Andstæðingar þeirra í síðustu umferðinni, Mikki refur, enduðu hins vegar í allt öðru sæti, eftir háðulegar útreiðir í síðustu umferðunum, svo háðulegar að forsprakki sveitarinnar er orðinn sköllóttur. Í þessari síðustu umferð fékk Litli Jón rúm 18 stig hjá Refnum og töluglöggir menn geta því reiknað út hlut refsins. Enginn refsskapur þar.
Sveit Litla Jóns skipuðu:
Jóhann Frímannsson, frændi Litla Jóns
Sigurður Skógabóndi Sigurjónsson, bróðir Litla Jóns
Örn Hauksson, föðurbróðir Litla Jóns
Svavar Hauksson, frænka Litla Jóns.
Í lokaleiknum áttust svo við Morgan Kane og Njálssynir. Njálssynir tóku loks á sig rögg og unnu leik, eftir brösótt gengi. "Þeir lágu bara vel við höggi" sagði Runólfur, yfirNjáll, hróðugur. Þar með lyftu þeir bræður sér upp úr botnsætinu.
Bangsímon átti yfirsetu og 12 stigin þar fleyttu þeim með nokkru öryggi upp í 3ja sætið.
Næst á dagskrá er ölkvöld hjá okkur Rangæingum, þar sem við leikum Barómeter, með ölverðlaunum fyrir alla flokka, líka Miðflokkinn.
Úrslit í sveitakeppninni má sjá hér
