Rangæingar -- Góðir gestir í heimsókn en "Reynast harðdræg Rangæsk mið"

Sl. þriðjudag urðu fagnaðarfundir á Heimalandi, heimavelli okkar Rangæinga, þegar góðir gestir úr uppsveitum Árnessýslu komu í heimsókn.  Í þessari árlegu sýslukeppni öttum við Rangæingar kappi við Hrunamenn í sveitakeppni og sendi hvort félag 6 sveitir til leiks.  Úrslitin urðu þau að Rangæingar unnu sigur á 5 borðum af 6 og urðu heildarstigin 84,53 gegn 35,47, Rangæingum í vil.  Hirðskáldi okkar Rangæinga, Magnúsi Halldórssyni fannst við Rangæingar gleyma gestrisni og gefa meira við kaffiborðið en við spilaborðið sjálft og mælti: 

Reynast harðdræg Rangæsk mið,

ráðum grimmdar beita.

Þeir gleymdu nær þeim góða sið,

gestunum að veita.

Úrsltin í sveitakeppninni má sjá hér.   

Til að krydda spilamennskuna og með tilbreytingu í huga var BUTLER árangur para reiknaður út  og verðlaunaður sérstaklega með blautlegum verðlaunum í anda jólanna.   Veitt voru fljótandi verðlaun fyrir efstu fjögur sætin, efsta sætið í kvennaflokki (önnur konan var reyndar skeggjuð og sagðist heita Baldur Garðarsson), fyrir minnsta mínusinn, fyrir að vera elstir og loks fyrir heiðurssætið að sjálfsögðu.

Efstir í BUTLERnum urðu fiskikóngarnir Torfi Sig. og Diddi.   Magnúsi fannst þeir vel að sigrinum komnir og mælti:

Skiluðu drengir skori stóru,

skarplega hirtur margur slagur.

Þeir á kostum þarna fóru

og það heitir meistarabragur.

BUTLER-árangur para og spil í fyrri hálfleik má sjá hér, í seinni hálfleik hér og loks úrsltiin í BUTLERnum í heild hér